نحلف بيك بقلم :عاطف عكرمي

نحلف بالتَّحويقة لي تحت عينيك وبالرَّعشة لي في يديك .. نحلف بالشمس الضواية .. ونحلف بفني وغنايا .. نحف بالنجوم لي تواسي والناس لي تقاسي وبأرواح الموتى وبفرحي وأعراسي ..

نحلف بضو النهار و بڨدك الحوار .. بيديك الدافية وبساتر الأسرار .. نحلف بالأرض والسماء .. و بالنار و لماء .. و بغمة ڨلبي وبالفرحة والعزاء ..

نحلف بهم الدنيا الخايبة والناس الغدارة والنار الشعالة .. نحلف برموش عينيك وضحكتك وخيالك وشدة يديك .. نحلف بشعرك الطويل وڨلبك العليل ..حاجبك الأكحل وزينك الهليل ..

نحلف بنفسك العزيزة .. و كلمتك الڨزيزة. حلاوة صوتك .. وشوافرك الغزيزة .. نحلف بهم الزمان وبالحب لي هان ..

بخدودك الحمرة .. وبالود إلي كان .. نحلف بحبي ليك .. وغرامي بيك .. بكلامك العسل .. وبتذبيلة عينيك .. نحلف بفراقك لي كواني .. وبعدك لي شواني نبرة صوتك والحب إلي خذاني .. نحلف بيك وإنت بصيرة خاطر كل صغيرة فيك، فيا كبيرة ..

نحلف بيك وإنت كريمة خاطر كل بسيطة فيك، فيا عظيمة .. نحلف بيك وإنت هوايا .. خاطر كل سطر فيك، فيا رواية .. نحلف بيك وإنت سميعة. خاطر كل جرح فيك، فيا وجيعة ..

نحلف بيك وإنت هنايا خاطر كل لحن فيك، فيا غناية .. نحلف بيك وإنت الروح خاطر كل ذبحة فيك، فيا جروح .. ونحلف بيك جهار بهار .. خاطر كل سر فيك، فيا أسرار.

بقلم :عاطف عكرمي من معهد بوڨطفة 2 سيدي حسين