mawsoaschoolكلام الليل تحتاج كتف صحيح، موش بدن يهزو الريح… تحتاج سند ما يخليكش طيح، يهزك ومايخليش قلبك يصيح.. ياقف معاك في الشدة ويعملك جو في الفدة.. تخزر لمرايتها.. شنيا لي صار.. موش قالو بش يواسيوني و في محنتي ما يخليوني…
موش أنا لي قالي إنت البنية لي بش نصون وعمري ما نخون، موش أنا مرتو و حلالو.. صغرونتو، دلولتو…موش أنا الصاحبة لي نستحق كل خير على وقفتي في فرحهم وفرحتي في فرحهم..و أنا لي بمال الدنيا ما نتبدل..
تي حتى بابا نور عيني لي في قفص قلبو خباني البارح مات وخلاني… خلاني على صغر سني نعاني.. وقتاش تجي الفرحة وقتاش توفى هالسرحة ..حلمة..شنحسبها في يوم حلمة وتتعدى ..
مع إنها كانت ديما كابوس من صياحي كل ليلة ما يتخبى.. كابوس كلاه السوس خبيتو في كتاب الدنيا و الدروس..وجيعة؟؟ كلمة من قاموسي محيتها ومن بالي نحيتها، في قلبي قتلتها وفي دنيتي نسيتها..
كانت صحبتها من ورى الباب تسمع فيها والدمعة هابطة على خديها..صحبتها وحبيبتها تعاني و لا من سامع و لا داري..دخلت عليها قالتلها لا تبكي ولا تعيطي، عينيك وقلبك الحلوين يستاهلو الحضن الحنين..إيجي نعنقك تعنيقة تمحي حزن سنين..
يقلم: جيهان بن عاشور – معهد أحمد عمارة الكاف