حبيتك وضيعتك بقلم: صادق تواتي

نحبك وحبيتك وتحبيت، ضيعتك وتضيعت منك ضعت فيك، من روحي تنحيت، نسيتك وتناسيت وكيف نسيتني تنسيت، حبيتك وضيعتك من عينيك تهزيت وتحطيت، غريب نلوج عليك مالوحش صنعتك، ريحتك تحكي عليك خبي فضايحي بالكلام خلعتك، خبي وجايعي من خيوط الدخان لدغتك، خمل روحي خمرت روحك وبلعتك، غطي عيوبي بالكلام خدعتك

خبي ندوبي بالكتيبة وجعتك، طليت على قلبي بالسرقة شيعتك،غطي جوارحي غبت عليا ركبت خيالي ولحقتك، نحبك وضيعتك مديدة نحكي وحدي كيف سكت سمعتك، منع ضياعي من ضياعك منعتك من ألف شمس خترتك وحدك، لقيتك ضايعة حبيتك وحدك، نحبك وفي السكات الموت بعدي، نحبك ياقلب شمسي ورعدي، ياعود نحاسي وذهبي، ياروح زماني

وسعدي ، ياريحة الصغر، عينيك تذكرني في مهدي، خلي وجيعتك تسكن، أقتل وجايع لبلاد قتلت وعدي، نحبك وضيعتك، نحيا ياحوى، حييت فيك ومنك ربيت الريش ومن ريق شفايفك لقلم صنعتك، توحشتك تذكرني في عز حاجتك منعتك، في عز ضعفك ونستك نتفكرش خليتك وقطعتك، علاه تقصني، علاه تنساني والغربة تحسني، تغيب عام ولحظة ترجع بالوجيعة تمسني، تغيب عمرك وتسرق عمري وتهزني.

كبرت في قلبي لين عروقي مالت على خاتر بعدك فاحت تنزني، صغرت في عيني لين صرت ضرير وعلى خاتر غيابك عينيا تحسني، علاه كي لبسة قديمة تلبسني، معلق قلبي على قلبك تسرق الريح وعلى حيطك تنفخني، توحشتك تذكر إلي ريحتك تنعوشني، توحشتك تذكر إلي روحك تعطشني، توحشتك تذكر إلي غيابك يرهوجني، تذكروتذكرني وتوحشني.

علاه تشبع مني وتطيشني، توحشتك تذكر كيف قتلي شد فيا وكبشني، تذكر صغرك من يدك تقلي ددشني، حملني وكان بعدت توحشني، تذكر وتذكرني، توحشتك تذكر، نسيت الدخان ريحتك تحششني وتضببني، علاه تهمل بيا ومن عزي تهملني، علاه تنسى بيا و تملى روحي وتفرغ عليا ماعاد صوتك يتوحشني، علاه تسلم فيا وسلامك يقتلني، توحشتك.

تذكر قتلي حرم عليا الدنيا نخاف تبدلني، تذكر ياعزيزة وتذكر تتوحشني، توحشتك تذكر روح بيا ليلة نحب مرة غيابك ننسى وعنق روحي وغني فيا تعليلة وفي وذني نحبك همسة و تفكر ومن جروحي سكر وخرجني سهرية طويلة وخاتر توحشتك، تذكر تتذكرني .وتوحشني من غيابك أسرق ليلة وتفكرني، أني نتذكر حتى في غيابك، نحشم إذا غبت عليك

بقلم : صادق تواتي -المعهد العالي للمالية والجباية بسوس